पूर्वयुवराज्ञी हिमानी बिहानै अर्यालटार बस्तीमा हिलाम्यै पुगिन् (भिडियो सहित)
मुलुकका विभिन्न भागमा जस्तै बिहीबार ट्रष्टकी अध्यक्ष हिमानी शाहसहित पदाधिकारीहरु अर्यालटारमा राहत सामाग्री वितरण गर्न आउने भएपछि स्थानीयबासीहरु विहानै देखि जम्मा भएर बाटो पर्खिरहेका थिए । राहत सामाग्री सहित ट्रष्टको टोली अर्यालटार पुग्दा स्थानीबासीको आर्कषणको केन्द्र बनेकी थिइन हिमानी । अझ उक्त बस्तीको हिँडेरै अवलोकन गर्न थालेपछि स्थानीयबासी झनै आकर्षित भएका थिए हिमानी प्रति ।
हिलो बाटो, सारी तथा स्याण्डल लगाएकी हिमानी आफ्नो कपडा स्याहार्दै भूकम्प प्रभावित अर्यालटार बस्तीको अवलोकन गरिन् । उनी गाउँ घुमिरहँदा स्थानीयबासी पूर्वयुवराज्ञीको हिँडाई, बोलाइप्रति आफ्नो ध्यान फ्याँकिरहेका थिए । उनले सो बस्तीको अवस्थाका बारेमा जानकारी लिइन्। उनी हिँडिरहँदा स्थानीबासी पनि अघिपछि लागेका थिए । पूर्वयुवराज्ञी हिमानी सहितको टोलीले अर्यालटार बस्तीको अवलोकन गर्नुअघि ५१ परिवारलाई राहत सामाग्री वितरण गरेको थियो । बिहीबार ट्रष्टले ५१ परिवारलाई प्रतिपरिवार एक बण्डल जस्तापाता, २ थान ब्ल्याङकेट र एक थान सौर्य बत्ति वितरण गरेको हो । पूर्व राजा ज्ञानेन्द्र शाहको ६९ औं जन्मोत्सवको अवसर पारेर बिहीबार सो बस्तीको भूकम्प पीडितलाई राहत सामाग्री वितरण गरेको हो । पूर्वराजा ज्ञानेन्द्रको जन्म वि.सं. २००४ साल असार २३ गते भएको थियो ।
