एउटा होटेल कम्तीमा दुई करोडदेखि आठ करोड लगानीमा निमार्ण भइरहेको छ। अमेरिकाको ज्याक्सन हाइटमा याक रेस्टुरेन्ट सञ्चालन गरेका स्थानीय सोनाम लामा पनि करिब आठ करोड लगानीमा मुक्तिनाथमा होटेल निमार्ण गरिरहेका छन्। आफ्नै गाउँमा केही गर्नुपर्छ भन्ने उद्देश्यले भाइले सुबिधा सम्पन्न होटेल निमार्ण गरिरहेको उनका दाजु तोपचेङ गुरुङले बताए। 

 

विदेशमा रहेका र स्वदेशमै विभिन्न सहरमा व्यवसाय गरेका युवा गाउँ फर्केर पर्यटनमा लगानी गरेको उनले सुनाए।लामो समयदेखि परिवारसहित काठमाडौंमा बस्दै आएका प्रेम गुरुङले पनि गाउँ फर्केर होटेलमा लगानी गरेका छन्। पर्यटन व्यवसायको भविष्य उज्वल देखेर तीन करोड बढीको लगानीमा ३१ वटा एटेच, स्विट र डिलक्स रुम बनाउँदै गरेको गरेको उनी बताउँछन्।

 

 विदेशमा र स्वदेशमा कमाइ गरेर फर्केका युवा मात्र होइन लामो समयदेखि मुक्तिनाथमै होटेल व्यवासय सञ्चालन गरेका व्यवसायीले पनि होटेलमा करोडौको लगानी बिस्तार गरेका छन्।विश्वमै प्रख्यात अन्नपूर्ण पदयात्रामा पर्ने भएकोले पनि मुक्तिनाथमा विदेशी पर्यटकको आगमन बाक्लो हुन्छ। 

 

यहाँको प्राचीन कला, संस्कृति, नीलगिरी, धौलागिरीलगायतका उच्च हिमाल पर्यटकका लागि मुख्य आकर्षण हुन्। लम्जुङको बेशीसहरबाट पदयात्रा सुरु गरी मनाङ याकखर्क हुँदै समुन्द्र सतहदेखि पाँच हजार चार सय १६ मिटर उचाइमा रहेको थोरङपास भएर बर्सेनि लाखौ पर्यटक मुक्तिनाथ आइपुग्छन्। मुक्तिनाथ समुुन्द्र सतहदेखि तीन हजार आठ सय मिटर उचाइमा छ।