भैंसीले अस्पतालभित्रै पसेर बितण्डा मच्चाएपछि … (फोटो कथा) डीएसपीले दुई गोली ठाेकेर भैंसी मारे
अस्पतालका कर्मचारीका अनुसार बिहान करिव साढे १० बजे भैंसी दौडिएर ओपीडी कक्षमा प्रवेश गरेपछि बिरामी र कुरुवाहरुको भागाभाग भएको थियो ।
तामाङका अनुसार मार्नका लागि टाउकोमा बञ्चराको पासाले हानेको अवस्थामा भैंसी भागेको जस्तो देखिन्छ । भैंसी अस्पतालको कोठा चहार्दै हिँडेपछि बिरामी, कुरुवासँगै आफन्तसमेत भागाभाग भए । त्यही क्रममा भैंसी जेनेरेटर राखिएको कोठामा पुग्यो ।
त्यही मौकामा हत्तपत्त ढोका लगाइदिएपछि भैंसी थुनियो । काठमाडौं महानगरपालिकाको गाडीसहित जनसेवा र जनपथ प्रहरी पुगे पनि भैंसीलाई समाउन सकिएन ।
दुई घण्टापछि प्रहरीले गोली हान्ने निर्णय गर्यो । प्रहरी जेनेरेटर कोठाको जस्ताको छानोमा चढ्यो र एउटा पाता हटाएर गोली हान्यो । दुई गोली लागेपछि भैंसी लड्यो ।
प्रहरीले भैंसीलाई गोली हान्दा अस्पतालका कर्मचारीहरुले छतबाट रमिता हेरेका थिए । मरेको भैंसी प्रहरीसहितको टोलीले गाडीमा हालेर लगेको छ ।
