राधजानीबाट बाहिरिने यात्रुसंग बढी भाडा असुल्ने ५० गाडी कारवाहीमा
| भूकम्पबाट प्रभावित भएकाहरु थप महामारी फैलिन सक्ने डरले राजधानीबाट बाहिरिनेको संख्या बढेको छ। तीमध्ये कलंकीबाट बाहिरिने यात्रुसँग तोकिएकोभन्दा बढी भाडा लिने केही गाडीलाई ट्राफिक प्रहरीले कारबाही गरेको छ। | |
काठमाडौं, वैशाख १६ - भूकम्पबाट प्रभावित भएकाहरु थप महामारी फैलिन सक्ने
डरले राजधानीबाट बाहिरिनेको संख्या बढेको छ । तीमध्ये कलंकीबाट बाहिरिने यात्रुसँग तोकिएकोभन्दा बढी भाडा लिने केही गाडीलाई ट्राफिक प्रहरीले कारबाही गरेको छ । समस्याको बेला मौका छोपेर बढी फाइदा लिने ५० वटा गाडीलाई प्रहरीले जरिवाना तथा कारवाही गरेको हो । भूकम्पपछि घर जाने यात्रुको संख्या बढेकाले केही गाडीहरुले मनोमानी ढंगले यात्रुसँग बढी भाडा लिँदै आएका छन् । त्यसमध्ये ना ४ ख ६६४६, बा १ ज ५७ ४९, ना ३ ख २८ ९४, ना ३ ख २८९४, ना ५ ख १४६८, बा २ ख ६८७ नम्बर लगायतका गाडीहरुलाई प्रहरीले कारबाही गरेको हो । ट्राफिक प्रहरीले यात्रुलाई बढी भाडा लिएर ठग्ने यातायात व्यावसायीलाई यात्रुको गुनासो र आफूले नै अनुगमन गरेर कारवाही गरिरहेको छ । अहिलेसम्म यात्रुसँग बढी भाडा असुलेर ठग्ने ५० वटा भन्दा धेरै गाडी र २५ जना भन्दा धेरै यातायात व्यावसायीलाई कारवाही गरिएको प्रहरीले जनाएको छ । सरकारले ती यातायात व्यावसायीलाई एक रात थुनामा राख्ने, बढी लिएको पैसा फिर्ता गराउने र ५ हजार जरिवाना गरिने ट्राफिक प्रहरी प्रवक्ता पोषनाथ पोख्रेलले जानकारी दिए । नेपाल प्रहरी र ट्राफिक प्रहरीले अझै पनि यातायात व्यावसायीले बढी भाडा लिएमा तुरुन्त ट्राफिक प्रहरीको १०३ ,नेपाल प्रहरीको फोन नम्वर १०० र सडकमा खटिएका ट्राफिक प्रहरीलाई जानकारी गराउन आग्रह समेत गरेको छ ।  |
