News » मिडियाको हल्ला - दरबार हत्याकाण्डको नयाँ नयाँ रहस्य खुल्दै, पारस आएपछि दरवार विभाजित

अज्ञात व्यक्तिले गोली चलाएर वीरेन्द्रको वंशनाश गरेको दाबी गरेका छन्।

अज्ञात व्यक्तिले गोली चलाएर वीरेन्द्रको वंशनाश गरेको दाबी गरेका छन्। १९ जेठ २०५८ मा नारायणहिटीको त्रिभुवन सदन (घटनास्थल) मा ड्युटीमा रहेका तत्कालीन सैनिक हवल्दार लालबहादुर लम्तेरी मगरका अनुसार हत्याराले पहिलो गोली नै दीपेन्द्रलाई हानेको थियो। दरबार हत्याकान्डको तीन महिनापछि हत्याको अभियोगमा मुद्दा चलेर अहिले नख्खु कारागारमा रहेका लम्तेरी मगरले गत साता नयाँ पत्रिकासित लामो कुराकानी गरे । उनले यतिसम्म भने, ‘दीपेन्द्रको ढाडमा ६ राउन्ड र बायाँ कन्चटमा एउटा ब्रस्ट फायर भएको हो।’ हरेक महिनाको अन्तिम शुक्रबार ‘गुड फ्राइडे’ मनाउने क्रममा त्यस रात (१९ जेठ २०५८) भोजमा सरिक तत्कालीन राजा वीरेन्द्रसहित उनको परिवारका पाँचैजना र नातेदारको पनि हत्या भएको थियो । सरकारले पहिले स्वचालित हतियार पड्किएको बताएको थियो भने पछि दीपेन्द्रले गोली चलाएर आफ्नै बाबु, आमा, भाइ र बहिनी मारेको प्रतिवेदन सार्वजनिक गरेको थियो। दीपेन्द्रले गोली चलाएका होइनन्, षड्यन्त्रपूर्वक वंश नै नाश गरेर दीपेन्द्रलाई दोषी बनाइएको हो भन्ने चर्चा जनमानसमा भए पनि घटनाका कुनै पनि प्रत्यक्षदर्शीले दीपेन्द्र हत्यारा होइनन् भनेर बयान दिएका थिएनन् । ‘दीपेन्द्रले होइन, नकाव लगाएर उनको जस्तै अनुहार बनाएको हतियारधारीले’ गोली चलाएको थियो भन्ने लम्तेरी घटनाको पहिलो ‘प्रत्यक्षदर्शी’ हुन्। उनका अनुसार नकावधारी तत्कालीन शाहजादा पारस शाहसँगै भित्र आएका थिए । ‘भोज चलिरहेको बेला पारस गाडीमा बाहिरए,’ लम्तेरीले भने, ‘केहीबरेपछि त्यही गाडीमा दीपेन्द्रको मुखुन्डोधारी भित्र आएको हो।’ लम्तेरीले घटना हुँदा दीपेन्द्र आफ्नै खोपीमा रहेको पनि बताए । ‘मलाई नै थाहा छ- दीपेन्द्र सरकार नसा लागेर खोपीमा सुतेका थिए, नकावधारीले पहिलो गोली त्यहीँ चलाएका हुन्, त्यसपछि चारैतिरबाट गोली चल्यो, मचाहिँ केराघारीमा ल्यान्ड पोजिसनमा बसेर बचेँ।’ लम्तेरी मगरका अनुसार दीपेन्द्र आफ्नै खोपीमा मरेका हुन् । ‘दुईजना एडिसीले लास उठाएर सैनिक प्रहरीको गाडीमा छाउनी पुर्‍याएका हुन् । दीपेन्द्र त्यतिबेलै मरिसकेका थिए,’ उनले भने। वीरेन्द्र र नीराजनको लास आफूले पनि उठाएको उनले बताए । ‘मैले पनि वीरेन्द्र र नीराजन सरकारको लास उठाएको हुँ,’ उनले भने, ‘वीरेन्द्र सरकारको लास लिएर सैनिक अस्पताल जानेमा म पनि थिएँ । सैनिक प्रहरीको गाडीमा म पछाडि बसेको थिएँ । बाटोमा वीरेन्द्रले सानो स्वरमा दुख्यो, दुख्यो भनेको मैले सुनेको हुँ । अस्पताल पुगेपछि के भयो थाहा छैन।’ गोलीको वर्षातपछि सन्नाटा छाएको घटनास्थलमा पारस खालीखुट्टामै आएको उनले बताए । ‘ल अब हस्पिटल लैजानुपर्‍यो भनेका थिए पारसले,’ लम्तेरीले भने, ‘पारस र उनका परिवारलाई केही पनि भएको थिएन।’ खोपीमा सुतेका दीपेन्द्र त्यहीँ मारिएको देखेका लम्तेरीले पछि दीपेन्द्र नै हत्यारा हुन् भन्दै प्रतिवेदन आएपछि आश्चर्यमा परेको बताए । दीपेन्द्र निर्दोष हुन् भन्दै उनले दरबारमा बिन्तीपत्र पनि हालेका थिए। ‘घटनाको साता दिनभित्रै जेठ २५ गते मसहित लेसनायक नरेन्द्र थापामगर, हवल्दार शिव कुँवर, नायक गुणबहादुर पुन र एउटा सिपाही भएर दरबारको प्रमुख सचिवालयमा बिन्तीपत्र हाल्यौं,’ लम्तेरीले भने, ‘हामीले बेनामी बिन्तीपत्रमा दीपेन्द्रबाट घटना भएको होइन, यसको निष्पक्ष छानबिन होस् भन्यौं।’ आफ्नो अभिभावकजस्तो मान्छे दीपेन्द्र मारिएपछि ‘त्यतिसम्मको दुस्साहस’ गरेको उनले बताए । तर ‘कतैबाट पोल खुलेपछि २९ जेठमै आफ्नै हाकिमहरूद्वारा समातिएको’ उनले बताए । ‘पहिले दरबारमा आतंक मच्चाएको भन्दै समातियो, पछि एउटा होटलमालिकलाई मारेको भन्ने झुटो केस चलाएर मुद्दा हालियो।’ आफू कलाकार पनि भएकोले दीपेन्द्रको प्यारो मान्छे भएको दाबी गर्दै उनले भने, ‘म सांगीतिक क्षेत्रको मान्छे, बाजा बजाउन, नाच्न, गाउन र खेल खेल्न सधैं अघि सर्थें, त्यसैले पनि दीपेन्द्र सरकारका लागि म निकै प्यारो मान्छे थिएँ।’ उनले दीपेन्द्रलाई मुड भएको बेला खोपीमै गएर गीत गाउने गरेको पनि बताए । ‘गीत सुन्नुपर्‍यो भने त्यो डल्लुलाई बोलाऊ भन्ने हुकुम हुन्थ्यो। म खोपीमै जान्थें गीत सुनाएर खुसी पार्थें,’ उनले भने। उनका अनुसार संगीतकार प्रवीण गुरुङलाई गाडीले किचेर मारेको आरोपमा तत्कालीन राजा वीरेन्द्रले पारसलाई कारबाही गर्न खोजेका थिए। ‘तर पारसको चुनौतीका कारण उनी (वीरेन्द्र) पछि हटे, उनले भने। लम्तेरी मगरका अनुसार प्रवीण गुरुङ मारिनुअघि श्रुतिले चलाएको कारको ठक्करले दरबारभित्रै तनहुँ घर भएका पुरानो गोरखगणका सिपाही मारिएका थिए। ‘ऊ ड्युटीमै उभिएको बेला गाडीको ठक्करले मर्‍यो । पछि बाहिर तालिमका बेला एम्बुसमा परेर मारियो भनेर परिवारलाई क्षतिपूर्ति दिइयो।’ पारसले आफूलाई भन्दा अघि श्रुतिलाई कारबाही गर्न वीरेन्द्रलाई चुनौती दिएपछि वीरेन्द्र मत्थर भएको लम्तेरीले बताए। दरबार हत्याकान्ड दीपेन्द्रले नगराएको भन्ने बिन्तीपत्र लेखेको चार दिनमा पक्राउ गरिएका लालबहादुर सोह्रखुट्टेस्थित आरामदायी लजका मालिक उत्तमराज पाण्डेको हत्या अभियोगमा जेल परेका हुन्। उनी जन्मकैदको सजाय नख्खु जेलमा बसेर भोगिरहेका छन् । ‘म निर्दोष छु,’ उनले भने, ‘मलाई जेल हाल्ने कुनै आधार थिएन, तर म गरिबको छोरोलाई कानुनले पत्याएन।’ उनको मुद्दा हेरेका अधिवक्ता भूमिनन्द चुँडालले पनि लम्तेरी निर्दोष रहेको जिकिर गरे । ‘लालबहादुरलाई जेल हाल्नुपर्ने कुनै आधार छैन,’ उनले भने ‘उनलाई हत्याको अभियोग लगाइएको छ, तर त्यसको कुनै पनि प्रमाण छैन । ऊ सफाइ पाउनुपर्ने मान्छे हो।’ नख्खु कारागारका जेलर चन्द्रप्रसाद देवकोटाले लालबहादुर कर्तव्य ज्यान मुद्दामा जेलमा रहेको बताए । देवकोटाका अनुसार उनी २ भदौ २०५८ देखि जेल छन् । जेलको रेकर्डअनुसार लम्तेरी पुरानो गोरखगणका सैनिक हुन् । लालबहादुरले आफूलाई सैनिक प्रहरीबाट नक्कली कागजात बनाएर पुरानो गोरखगणमा सरुवा मात्र होइन, घटुवा गरेर जेलमा हालिएका बताए। लम्तेरीको बयान - म लालबहादुर लम्तेरी मगर, घर पाल्पाको ठिमुरे हो । २०४९ सालमा सेनामा भर्ती भएर दरबारको सैनिक प्रहरीमा काम गर्न थालेको हुँ। म खेलाडी पनि थिएँ, गीत-संगीतमा त च्याम्पियन । ‘रोयल फेमिली’सँग एकदमै नजिक । दीपेन्द्र सरकारले मलाई यति माया गर्ने कि म कसरी भनौं ! कतिसम्म भने मेरी श्रीमती डेलिभरी हुँदा दीपेन्द्रबाट १० हजार रुपैयाँ बक्सिस प्रदान भएको थियो। दरबारमा काम गर्दा त मोजमस्ती थियो, खर्चको अभाव हुँदैनथ्यो । केही पर्‍यो भने पैसा पाइहाल्थें । दीपेन्द्र सरकारले त मलाई खोपीमै बोलाएर बाजा बजाउन लगाउने, पैसा दिने, बडो माया गर्ने। जागिर खाएको नौ वर्षमा मेरो जीवनमा ठूलो चोट पर्‍यो, मैले अनाहकमा दुःख पाएँ । महिनाको अन्तिम शुक्रबार शाही परिवारले जलपान गरेर ‘गुड फ्राईडे’ मनाउने चलन थियो । १९ जेठ २०५८ मा पनि जलपान आयोजना भयो दरबारमा । त्यो दिन म पनि बाहिरी ड्युटीमा थिएँ । दौरा, सुरुवाल, कोट र कालो टोपी लगाएर पेस्तोल भिरेर म ड्युटी गरिरहेको थिएँ। त्यतिबेला मलाई याद छ - नेपाल टेलिभिजनमा सन्तोष पन्तको ‘हिजो आजका कुरा’ कार्यक्रम आउँथ्यो। अबेरसम्म जलपान भइरहेको थियो। त्यहीबीचमा पारस गाडीमा बाहिरिए । एकैछिनपछि उनको गाडीमा केही मान्छे भित्र छिरे, पारस पनि छिरे । यो दृश्य त्रिभुवन सदनमा गार्ड बस्ने अरू सैनिकले पनि देखेका छन्। त्यसपछि फायरिङको आवाज आयो। दीपेन्द्र सरकार नसाले लठ्ठ भएर आफ्नै खोपीमा सुतेको मलाई पनि थाहा छ । भित्र जान हामीलाई अनुमति थिएन । आदेशबिना दायाँबायाँ गर्न पनि नपाइने । दरबारको ड्युटी फेरि निकै कडा हुन्छ क्या ! मैले थाहा पाएँ, पहिलो फायर दीपेन्द्र सरकारको खोपीमा भयो । त्यहाँ सात फायर भएपछि त जलपान भएको ठाउँमा एकैचोटि गोली चल्यो । बाहिर पनि । दीपेन्द्रको मुखुन्डो लाएको हतियारधारीले गोली चलायो । वीरेन्द्रका परिवारलाई ताकी-ताकी हान्यो उसले । दीपेन्द्रलाई त ब्रस्ट फायर भयो । बाहिरसमेत गोली चलेपछि ज्यान जोगाउन मुस्किल भो । म त्रिभुवन सदनअगाडि बगैंचामा लुकें। गोली रोकिएपछि पारस खालीखुट्टा आइपुगे, खुट्टामा जुत्ता, चप्पल केही थिएन । उनले आउनेबित्तिकै भने- ल भाइ हो, हस्पिटल लानुपर्छ । त्यसपछि घाइते र लास उठाउन थालियो । म पनि लास उठाउन गएको थिएँ । मैले वीरेन्द्र सरकार र नीराजनलाई उठाएँ । ऐश्वर्यको चिउँडो छेडेर गोली चलेको रहेछ । चिउँडो त पंखामा झुन्डिएको रहेछ। अस्पताल जाँदासम्म सास भएको अवस्थामा वीरेन्द्र सरकार र श्रुति थिए । धीरेन्द्रको बारेमा मलाई थाहा भएन । वीरेन्द्रको मृत्यु भइसकेको थिएन । वीरेन्द्रलाई हालिएको सैनिक प्रहरीको गाडीमा पछाडि बसेर म पनि छाउनी अस्पताल गएको थिएँ । म सम्झिन्छु, अस्पताल पुग्ने बेलासम्म वीरेन्द्र दुख्यो, दुख्यो भनेर सानो स्वरमा भनिरहेका थिए। सैनिक अस्पताल पुर्‍याइए पनि वीरेन्द्र सरकारलाई तत्कालै उपचार गरिएन, ऐश्वर्यको मुख नभएकोले प्लास्टिक सर्जरी भयो । हामीले धेरै हेर्न पाएनौं । हामी त हाकिमको आदेशअनुसार अस्पतालबाट फक्र्यौं । त्यसपछि के गरियो थाहा भएन। मैले आफैं देखेको, दीपेन्द्रको पहिले नै हत्या भइसकेको थियो । तर, दीपेन्द्रलाई दोषी बनाएपछि मेरो मन धेरै रोयो । म र साथीहरूले जेठ २५ गते १२ बजेतिर बिन्तीपत्र तयार गर्‍यौं र ४ बजेतिर प्रमुख सचिवालयमा दर्ता गर्‍यौं । सायद हाम्रो रेकर्ड सचिवालयमा होला अहिले पनि । बिन्तीपत्र हाल्नेमा म अगुवा थिएँ । बिन्तीपत्र दिनेमा लेसनायक नरेन्द्र थापामगर, हवल्दार शिव कुँवर, नायक गुणबहादुर पुन र अर्का एक सिपाही थियौं। हामीले बिन्तीपत्र दिएपछि त त्यहाँ हलचल भएछ। हामीले भनेका थियौं- दरबार हत्याकान्डमा युवराज दीपेन्द्र सरकार दोषी होइनन्। पहिलो फायर नै उनीमाथि भएको हो। त्यसकारण निष्पक्ष छानबिन होस्। बिन्तीपत्र हालेको चार दिनमा दरबारमा आतंक मच्चाएको भन्दै मलाई पक्राउ गरियो । २९ जेठमा ड्युटी सकेर खाना खाएर कोठामा पल्टिन लाग्दा निर्मल निवास (सदन- हाम्रो भाषामा) को फौज आएर मलाई समात्यो। मलाई आँखामा कालोपट्टी बाँधेर क्वार्टर गार्डमा (हिरासतमा) राखियो। जबकि मेरो दोष केही पनि थिएन। आँखामा पट्टी बाँधेर नेपाली कागजहरूमा ल्याप्चे लगाउन लगाइयो। एक सातापछि मलाई हनुमानढोकामा लगेर बुझाइयो । त्यसपछि मलाई एक महिनाजति झुलाइयो। कहिले सैनिक हेडक्वार्टर, कहिले प्रहरी हेडक्वार्टर, कहिले कता लगेर एक महिना झुलाइयो। दरबारभित्रको सैनिक हिरासतमा रहँदा मलाई ल्याप्चे लगाउन लगाइयो । पछि थाहा भयो, मलाई पुरानो गोरखगणमा सरुवा गरेर सिपाहीमा घटुवा गरेको कागज बनाइएछ । र, सैनिक प्रहरीमा रहेको मेरो कागजात सबै खतम पारिएछ । एक महिनाअघि समातेर मलाई एक महिनापछि भएको घटनामा फसाइयो। २ साउन २०५८ मा सोह्रखुट्टेको आरामदायी लजका मालिक उत्तमराज पाण्डेको हत्या भएको रहेछ । मैले जेलमा बसेपछि सुनेअनुसार दरबारका एक क्याप्टेनले पाण्डेलाई गोली ठोकेर मारेका रहेछन् । पाण्डे नवलपरासीका रहेछन् भन्ने मलाई फसाइएको नक्कली कागज हेरेर थाहा पाएँ । तर, कुन केसमा पाण्डेलाई किन मारियो भन्ने मलाई केही थाहा थिएन किनकि म त एक महिनाअघि नै पक्राउ परिसकेको थिएँ। मलाई ५ भदौ २०५८ मा पुर्पक्षका लागि भनेर जेल हालियो । जेलमा बसेर मुद्दा लडें । सुरुमा वकिल भूमिनन्द चुँडाल र पछि तारा खनालको सहयोग लिएँ । १३ फागुन २०६० मा काठमाडौं जिल्ला अदालतले मलाई दोषी ठहर गर्‍यो । र, म जेल परें। म हिरासतमा बस्दा शाही रक्षक बाहिनीका बाहिनीपति सुदर्शन खड्का, पारसका हितैषी अनुप सिंह मलाई भेट्न आइरहन्थे। उनीहरू भन्थे- दरबार तिमीप्रति पोजिटिभ छ । हामी छुटाउन पहल गरिरहेका छौँ। तर, दरबारले मेरो जिन्दगी बर्बाद बनाइदियो। बिन्तीपत्र हाल्ने मेरा साथीहरूलाई पनि समातियो भन्ने थाहा पाएँ, तर उनीहरू अहिले मरे-बाँचेको मलाई थाहा छैन। यो पनि लेखिदिनुस्- दरबार हत्याकान्डमा सैनिकहरू पनि मारिएका छन्। मलाई यकिन विवरण त छैन, तर छानबिन गरे थाहा हुन्छ। मारिएका परिवारलाई अरू केही वहानामा क्षतिपूर्ति दिइएको हुन सक्छ, तर हत्याकान्डमा सैनिक मारिएका छन्। सत्यतथ्य खोजी गर्ने हो भने पारसलाई समातेर बयान लिनुपर्छ। सबै कुरा थाहा हुन्छ । सरकारले चाहने हो भने दरबार हत्याकान्डको बारेमा निष्पक्ष छानबिन गर्न अझै पनि सक्छ। पारस नेपाल आएपछि दरवार विभाजित - ३ वर्ष सम्म घर बाहिर होइन देश बाहिर बसेका पूर्व युवराज पारस साह विहीबार काठमाडौंमा ओर्लिए । काठमाडौंमा ओर्लिँदा उनलाई समर्थकहरुले नारावाजी सहित स्वागत गरे । तर अनौठो ३ वर्ष पछि स्वदेश फर्केको छोरोलाई लिन न त पूर्वाराज ज्ञानेन्द्र नै विमानस्थल पुगे नत्र पारस पत्नि हिमानी नै । त्यति मात्र होइन पारसले आफ्नै घरमा बास पाएनन् । करिव ४ वर्ष देश बाहिर बसेका पारस आउँदा दरवारमा जति खुसियाली हुनु पर्ने हो त्यस्तो केही देखिएन बरु उल्टो तनाव देखियो । ज्ञानेन्द्रले छोरा पारसलाई निर्मल निवासमा समेत स्वागत गर्न चाहेनन् । निर्मल निवासबाट एक किलोमिटर टाढाको दुरीमा रहेको धुम्बाराही स्थित कुण्डलिनीमा पारसले रात विताए । ४ वर्ष पछि घर फर्किँदा पनि पारस शरणार्थी बने। पारस र ज्ञानेन्द्रको मनोयुद्ध - छोरा पारसका कारण बदनामी खेप्नु परेको महसुस गरेका पूर्व राजा ज्ञानेन्द्र अव छोरासँग आफूलाई जोडिरहन चाँहदैनन् । उनले पारसलाई बाहिर राखेरै सवक सिकाउने रणनीति लिएका छन् । ज्ञानेन्द्रको भित्री मनसाय विदेशमा बसेर दुर्ब्यसनी बनिसकेको छोरालाई पुनर्स्थापना केन्द्रमा राखेर उपचार नै गर्ने रहेको भएपनि परिवारभित्र भने यो विषयमा विवाद रहेको श्रोतले बताएको छ । छोरो काठमाडौंमा आइसक्दा पनि ज्ञानेन्द्रले पारसलाई भेट्न सम्म नचाहेको दरवार श्रोतको भनाई छ । पारस र ज्ञानेन्द्रबीच राजतन्त्रको अन्त्य हुने समय देखि नै मतभेद रहेको बताइन्छ । पारसले बाबुकै कारण २४० वर्ष पुरानो राजतन्त्र गएको खुलेर नबोलेपनि राजतन्त्रको अवसान हुनु अघि राजाकै नेतृत्वमा रहेको सरकारका मन्त्रीलाई त झापड नै हानेको खुलासा भएको थियो। राजतन्त्र गुमेपछि पारसको पारिवारिक सम्बन्ध विग्रेको मात्र होइन पत्नि हिमानीसँग समेत समस्या भएको थियो । बाबुसँग खुलेर झगडा गर्न पनि नसक्ने तर भनेको मान्न पनि नसक्ने पारस त्यसपछि सिंगापुर हुँदै थाइल्याण्ड गए र त्यहाँ दुर्ब्यसनीको स्तरमै पुगे । उनी त्यहाँ गाँजा सहित पक्राउ परे र जेल समेत गए। नेपालका पूर्व युवराज थाइल्याण्डमा पक्राउ भनेर सञ्चार माध्यममा हंगामा भएपछि सबै भन्दा बढी ज्ञानेन्द्रलाई पोल्यो। पारसलाई हृदयघात भएपछि एक पटक उनी छोरालाई भेट्न थाइल्याण्ड गएपनि तर विरामीबाट उठेपछि पनि छोराको बानी नसुध्रिएपछि भने ज्ञानेन्द्रले छोरालाई त्याग्ने निर्णयमा पुगेको बताइन्छ । पारसले बाबुका कारण राजतन्त्र गएको टिप्पणी गर्छन् भने ज्ञानेन्द्र छोराको ब्यवहारले आफू बदनाम हुनु परेको र जनताबाट पाउनु पर्ने साहनुभूति समेत नपाएको अनुभव गर्ने दरवार निटकका एक पूर्व सुरक्षा अधिकारीले बताए। दरवार नै विभाजित - पारस काठमाडौं आएपछि दरवारमा शान्ति हुनुको साटो अशान्ति भएको छ । नागार्जुन देखि निर्मल निवास सम्म पारस र ज्ञानेन्द्रको मनोयुद्धको प्रभाव देखिन्छ । दरवारका कतिपय सदस्य पारसलाई निर्मल निवास वा नागार्जुन राखेर राम्रो बाटोमा ल्याउनु पर्ने पक्षमा छन् भने कतिपय भने ज्ञानेन्द्रकै मनस्थितिमा उनी नसुध्रिए सम्म स्वागत गर्न नहुने पक्षमा छन् । यस्तो चेपुवामा पूर्व रानी अर्थात पारसकी आमा कोमल देखि पारसकी पत्नि हिमानी सम्म परेका छन् । पारसले थाइल्याण्डमा गएर प्रेमिका बनाएको मात्र होइन नेपाल ल्याउने सम्मका चर्चा सार्वजनिकरुपमा नै चलेपछि दरवारमा झनै अहसज अवस्था आएको छ । पारसकै तीन सन्तान हुर्काइरहेकी हिमानी पनि पति पारससँग खुसी नभएको बताइन्छ । पारस सुध्रिने र प्रेमिकालाई छोड्ने सुनिश्चित नभए सम्म उनी पनि पारससँग सम्बन्ध राम्रो हुन नसक्ने अडानमा रहेको पारसका एक साथीले नेपाली हेडलाइन्सलाई बताए। धरापमा हिमानी पारस सम्बन्ध - हुन त पारस र हिमानी साहको सम्बन्ध अव कानूनी र कागजी मात्र भएको टिप्पणी शुरु भएको धेरै भैसक्यो । पारसले सार्वजनिक रुपमा नै प्रेमिकासँग सयर गर्न थालेपछि दरवारीया इज्जत बँचाउन मुस्किलमा परेकी हिमानी पारससँग जीवन विताउन र छुटाउन दुवै नसक्ने अवस्थाका कारण धर्म संकटको अवस्थामा रहेको एक दरवार निकट अधिकारीले बताए । त्यही तनावका कारण पनि हिमानीले सामाजिक काममा ध्यान दिन हिमानी ट्रष्टको माध्यमबाट सक्रिय रहेको उनको दावी छ। दरवारको चलनलाई उल्लङ्घ गर्न पनि नसक्ने त्यहाँ भित्र रहन पनि कठिन हुने धर्म संकटमा उनी रहेको बताइन्छ । पारसका उद्दण्ड गतिविधी र दरवारिया अनुशासनका कारण पारस हिमानी सम्बन्ध न निल्नु न थुक्नुको अवस्थामा पुगेको विश्लेषण समेत कतिपयले गरेका छन्।