सन्दिप भट्ट चितवन, माघ ३–नेपाललाई पुनः हिन्दू राष्ट्र घोषणा गरिनुपर्ने माग राख्दै हजारौँ जनता चितवनको सडकमा ओर्लिएका छन् । हिन्दू राष्ट्र बचाउँ अभियान २०७१ को आयोजनामा शुक्रबार चितवन, नवलपरासी र तनहूँको विभिन्न स्थानबाट ओमकार परिवारका व्यक्तिहरु नारायणगढमा उपस्थित भएका थिए । ओमकार लेखिएको झण्डा, भजनकिर्तन, नारा सहित निस्किएको ¥याली नारायणगढको क्याम्पाचौरमा पुगेर कोण सभामा परिणत भएको थियो । उक्त कोणसभालाई सम्बोधन गर्दै सन्तहरुले नेपाललाई जनताको चाहना विपरीत धर्म निरपेक्ष राष्ट्र बनाइएको भन्दै पुनः हिन्दू राष्ट्र कायम गर्नुपर्ने माग गरेको थिए । केहि मुठीभरका नेताहरुले विदेशीको इशारामा नेपाललाई धर्म निरपेक्ष घोषणा गरेका कारण अब बन्ने संविधानमा हिन्दू राष्ट्र उल्लेख गरिनुपर्ने सन्तहरुको भनाई थियो । सभालाई सम्बोधन गर्दै प्रमुख अतिथि डाक्टर रामानन्द गिरीले जन्मभूमिको रक्षार्थ नेपाललाई हिन्दू राष्ट्र नै कायम गर्नुपर्ने बताए । नेपाल हिन्दू राष्ट्र भएमा समग्र धर्मावलम्बीहरुको लागि पनि गौरबको विषय हुने गिरीको भनाई थियो । नेपाल हिन्दू राष्ट्र हुँदा कुनै पनि धर्ममाथि प्रहार भएको थिएन र धर्मको मामिलामा सबै धर्मका व्यक्तिहरु पनि नेपालमा नै सुरक्षित थिए गिरीले भने । युवा विद्वान चैतन्यकृष्णले नेपाललाई हिन्दू राष्ट्र बनाउनको लागि शुक्रबार चितवनमा गरिएको आन्दोलन सुरुआती आन्दोलन भएको बताए । नेपाल हिन्दू राष्ट्र हुँदा हाम्रो मन्दिरमा कसैलाई पनि प्रवेश निषेध गरिएको थिएन, चैतन्यकृष्णले भने, सबै धर्मपीठहरुमा सबै सम्प्रदायका व्यक्तिहरु पूजारी छन् । मनकामना मन्दिरमा मगर, बुढासुब्बामा लिम्बू, जनकपुरको रामजानकी मन्दिरमा मधेसी समुदायको पूजारी भएको बताउँदै चैतन्य कृष्णले भने, –‘नेपाल हिजो पनि हिन्दू राष्ट्र थियो, आज पनि हो र भोलि पनि हिन्दू राष्ट्र हुनेछ ।’ बेलायतको विद्यालयहरुमा संस्कृतको पढाई अनिवार्य जस्तै भएको र जर्मनको समाचार संस्थाले संस्कृतमा समाचार बाचन गर्ने गरेको बताउँदै नेपालमा गीता र महाभारतको पढाई अनिवार्य हुनुपर्ने चैतन्यकृष्णले बताए । १ सय ४५ राष्ट्र धर्मसापेक्ष मुलुक रहेकोमा नेपाललाई धर्मनिरपेक्ष भनि घोषणा गरीनु न्यायसंगत निर्णय नभएको चैतन्यकृष्णको भनाई छ ।
