राजविराज : सप्तरीको बैरबा गाविसस्थित कोसी नदीको पश्चिम तटबन्धनजिक शनिबार तीन बालबालिकाको शब फेला परेको छ। 

 

बैरवा गाविस-३ स्थित कोसी नदीको पश्चिम तटबन्धको पूर्वतर्फ जमेको पानीमा बालबालिकाको शव वेवारिसे अवस्थामा फेला परेको प्रहरलिे जनाएको छ।प्रहरी नायव उपरिक्षक केदार ढकालका अनुसार छ वर्षीय बालक, तीन वर्षीया र छ महिनाकी काखे बालिकाको शव प्रहरीले तटबन्धको पूर्वतर्फ जमेको पानीबाट निकालेको हो।

 

सनाखत हुन नसकेको ती बालबालिकालाई हत्या गरेर फालेको हुनसक्ने प्रहरीले अनुमान गरेको छ। प्रहरीले घटनास्थलबाट विषको एउटा बोतल, एक थान सारी र महिलाले लगाउने एक जोडी चप्पलसमेत बरामद गरेको जनाएको छ। घटनाबारे अनुसन्धान भइरहेको प्रनाउ ढकालले जानकारी दिए।

 

प्रहरीले मृतक तीनवटै शवलाई पोष्टमार्टमका लागि राजविराजस्थित गजेन्द्रनारायण सिंह सगरमाथा अञ्चल अस्पतालमा राखेको छ। घटनाको तिव्रताका साथ अनुसन्धान भइरहेको सप्तरी प्रहरीले जनाएको छ।