कमिशनको लोभमा विरामीलाई भारत पठाउँछन् चिकित्सक
२२ जेठ, लखनउ (भारत) । कमिसन पाउने लोभमा नेपाली चिकित्सकहरुले बिरामीलाई भारतका विभिन्न अस्पतालमा रिफर गर्ने गरेकाले पश्चिम नेपालका बिरामीहरु भारतीय अस्पतालमा पीडित हुने गरेका छन् ।अछामबाट धनगढीमा उपचार गर्न आएका कृष्ण खड्काको सीमावर्ती क्षेत्र पिलिभितको एउटा नर्सिङ होममा उपचारका क्रममा मृत्यु भयो । सामान्य विरामी भएका कृष्णले धनगढीमा जचाउँदा नेपाली चिकित्सकले पत्थरी भएको र त्यसको सस्तो र राम्रो उपचार पिलिभितमा हुने भन्दै त्याहाँ रिफर गरेपछि उनी परिवारका साथ उपचार गराउन पिभिलित पुगेको गोरखापत्रमा खबर छ ।
कृष्ण खड्कालाई विभिन्न किसिमका जाँच गर्नुपर्छ भन्दै एक महिनािसम्म नर्सिङ होममा राखियो । करिब ८० हजार रुपैयाँ खर्च भयो तर कृष्ण बाँचेनन् । उनका भाइ बीरेन्द्र खड्काले भने, ‘उपचार गर्छु भन्दाभन्दै मिर्गौला निकालेको हो कि भन्ने आशंका थियो, त्यही नै भएछ । एकातिर पैसा गयो, अर्कोतिर बचाउन सकिएन । अर्काको देशमा गुनासो सुन्ने कोही छैन ।’
लखनउको सुदान्त अस्पतालमा भेटिएका कालिकोटका दानी बिष्टकी आमाको उपचारमा हालसम्म दुई लाख भारतीय रुपैयाँ खर्च भइसकेको छ तर अझै निको हुन सकेको छैन । कालिकोटबाट नेपालगञ्जमा उपचारका लागि आएका दानीलाई पनि छ महिनाअघि रोग गम्भीर भएको भन्दै लखनउ रिफर गरिएको थियो ।
