तेस्रो यू-१६ साफ च्याम्पियनसिप फुटबल

काठमाडौं: तेस्रो यू-१६ साफ च्याम्पियनसिप फुटबलमा नेपालले सुखद सुरुआत गरेको छ। बंगलादेशको सिलेटमा जारी च्याम्पियनसिपको पहिलो खेलमा नेपालले सोमबार माल्दिभ्सलाई ५-० गोलले हरायो।

 

खेलको सुरुदेखि नै आकर्षक प्रदर्शन गरेको नेपालले माल्दिभ्सलाई पूरै समय दबाबमा राखेको थियो।नेपालको सजिलो जितमा प्रेजन तामाङ र सुमन अर्यालले दुईदुई गोल गरे। एक गोल भने लक्ष्मण परियारले गरेका थिए।लक्ष्मणले खेलको तेस्रो मिनेटमै खाता खोलेका थिए। 

दोस्रो गोल प्रेजन तामाङले १८ औं मिनेटमा गरे। प्रेजनले ५० औं मिनेटमा व्यक्तिगत दोस्रो गोल थपेका थिए। सुमनले २१ औं मिनेटमा तेस्रो गोल गरेका थिए। 

 

सुमनले दोस्रो हाफको इन्जुरी समयमा हेडमार्फत गोल थपेका थिए। उनले अशोक रिजालको कर्नर पासमा उत्कृष्ट हेड गर्दै बललाई जाली चुमाए।समुको अर्को खेलमा नेपालले शुक्रबार अफगानिस्तानसँग प्रतिस्पर्धा गर्नेछ। 

नेपाली टोलीका प्रशिक्षक उपेन्द्रमान सिंहले खेलाडीले सोचे अनुरूप नै प्रदर्शन गरेको बताए। 'खेलको सुरुमै गोल गरेकाले जित्न सहज भयो। हाम्रो लक्ष्य समूह विजेता बन्दै उपाधि जित्ने हो’, सिंहले भने । माल्दिभ्सका प्रशिक्षक अहमद साहिदले नेपाल उत्कृष्ट टोली भएको बताए। 

 

'टिम सेट नहुँदै गोल खाएकाले हामीलाई खेलमा फर्कन गाह्रो भयो। नेपाल उपाधिको दाबेदार टोली हो। मेरा खेलाडीको प्रदर्शनबाट म सन्तुष्ट छु', साहिदले भने।

अगस्ट १८ तारिखसम्म सञ्चालन हुने च्याम्पियनसिपको समूह 'ए' मा आयोजक बंगलादेश, श्रीलंका र भारत छन्। च्याम्पियनसिपमा भुटान र पाकिस्तान भने सहभागी छैनन्। समूहका दुई टोली सेमिफाइनलमा पुग्नेछन्। 

 

यो च्याम्पियनसिप कीर्गिस्थानमा आयोजना हुने एएफसी यू-१६ च्याम्पियनसिपको छनोट खेल पनि हो। यसअघि समूह 'ए' अन्तर्गत आइतबार भएको उद्घाटन खेलमा भारतले श्रीलंकालाई ५-० गोलको फराकिलोअन्तरले हराएको थियो।

च्याम्पियनसिपको पहिलो र दोस्रो संस्करण नेपालमा आयोजना भएको थियो। पाकिस्तान पहिलो संस्करणको विजेता हो। सन् २०११ मा काठमाडौंमा भएको पहिलो संस्करणको फाइनलमा पाकिस्तानले भारतलाई २-१ गोलले हराएको थियो। 

 

पहिलो संस्करणमा नेपाल तेस्रो भएको थियो। दोस्रो संस्करणको उपाधि भने भारतले जितेको थियो। साबिक विजेता भारतले फाइनलमा आयोजक नेपाललाई १-० गोलले हराएको थियो।