ढाका, १ भदौ । बङ्गलादेशको प्रहरीले यहाँका दुईजना ब्लगरको हत्यामा सम्लग्न तीन जनालाई मङ्गलबार पक्राउ गरेको जनाएको छ । प्रहरीकाअनुसार ती तीन जनामा एकजना बेलायती नागरिक पनि रहेको समाचारमा जनाइएको छ । अरु तीन जना भने इस्लामिक हतियारधारी रहेका छन् । 

 

उनीहरुलाई राजधानी ढाकाबाटै पक्राउ गरिएको जनाइएको छ । पक्राउ गरिएका तीनजना यसअघि पछिल्लो समयमा बङ्गलादेशमा मारिएका दुईजना ब्लगरका हत्यारा भएको पत्ता लागेको पनि प्रहरीले जनाएको छ । बङ्गलादेश प्रहरीको ¥यापिड एक्सन बटालियनले उनीहरुलाई पक्राउ गरेको सो बटालियनका प्रवक्ताले मङ्गलबार सो जानकरी दिएका हुन् । उनकाअनुसार पक्राउ गरिएका एकजना ५८ वर्षीय तुहिदुर रहमान हुन् भने अरु दुई जना गत मे महिनामा प्रतिबन्धित एक सङ्गठन अन्सारुल्लाह बङ्गला टिमका सदस्य रहेका छन् । 

 

उक्त समूह गएको मे महिनादेखि बङ्गलादेश सरकारले प्रतिबन्धित गरेको समूह हो । मे महिनाअघि पनि सो समूहले बङ्गलादेशका ब्लगरको हत्या गरेको पुष्टि भएपछि सो समूह प्रतिबन्धित भएको हो । 

 

ती प्रवक्ताले भने– हामीले तीन जनालाई राजधानी ढाकाबाट पक्राउ गरेका छौँ र ती मध्ये रहमान बङ्गाली मूलका बेलायती नागरिक हुन् । केही समयमात्र अघि बङ्गलादेशमा अभिजित रोय र अनन्त विजय दाशको हत्या भएको थियो । यी दुवै जनाको हत्याको प्रमुख योजनाकार नै ती बेलायती नागरिक रहेको प्रहरीले जनाएको छ । 

रोय र दाशसहित यस वर्षको सुरुदेखि आजसम्ममा चारजना ब्लगरहरु बङ्गालादेशमा मारिइसकेका छन् । तीमध्ये रोय र दाश दुईजना हुन् । बङ्गलादेशको राजधानी ढाकामै जन्मिएका रोय गत फेब्रुअरी महिनामा मारिएका हुन् । उनलाई छुरी धसेर मारिएको थियो । त्यस्तै उत्तरपुर्वी बङ्गलादेशको साइलहाट सहरको एक बैंकमा कामगर्ने दाश ३३ वर्षका थिए । उनी पनि गत मे महिनामा सोही नगरमा मारिएका हुन् ।