अफगानिस्तानलाई हराउँदै नेपाल फाइनलमा
१० भदौ, काठमाडौं । अफगानिस्तानलाई पराजित गर्दै नेपाल यू-१९ साफ च्याम्पियनसिप फुटबलको फाइनलमा प्रवेश गरेको छ ।
सातदोबाटोस्थित एन्फा कम्प्लेक्समा नेपालले अफगानिस्तानलाई ३-२ गोल अन्तरले पराजित गरेको हो ।
खेलमा नेपालले ३४ औं मिनेटमा अग्रता लिएको थियो । सुनिल बलको कर्नरमा अन्जन विष्टले हेड गोल गरे ।
दुई मिनेट लगतै अन्जनले पेनाल्टीमार्फत दोस्रो गोल गर्दै नेपालको अग्रता दोब्बर पारे । उनले पहिलो पटक बल प्रहार गर्दा अन्य खेलाडी अघि बढेको भन्दै रेफ्रीले फेरि पेनाल्टी हान्न लगाएका थिए ।
दोस्रो हाफको सुरुमा नै नेपालले गोल खायो । बल क्लियर गर्ने क्रममा अन्जनले आत्मघाती गोल गरे ।
तर, सुनिल बलले उत्कृष्ट फ्रीकिक गोल गर्दै नेपाललाई ३-१ को अग्रता दिलाएका छन् । ७२ औं मिनेटमा नेपालले गोल खाएको छ ।
