News » एमआरपी हटाउदै दुई वर्षभित्र ई–पासपोर्ट लागू गर्ने तयारी

काठमाडौं । परराष्ट्र मन्त्रालयले आगामी दुई वर्ष्भित्र अत्याधुनिक विद्युतीय राहदानी ई(पासपोर्ट) जारी गर्ने लक्ष्यका साथ आवश्यक तयारी अघि बढाएको छ । सन् २०१७ भित्र मेसिन रिडेबल पासपोर्ट (एमआरपी) लाई विस्थापित गरी अत्याधुनिक राहदानी जारी गर्नेसम्बन्धी कार्ययोजना परराष्ट्रमन्त्री महेन्द्रबहादुर पाण्डेले गत शुक्रबार अनुमोदन गरेका हुन्। अन्तर्रा्ष्ट्रिय नागरिक उड्डयन प्राधिकरण (आईकाओ) को बाध्यकारी प्रावधानअनुसार नेपालले सन् २०११ देखि मेसिन रिडेबल पासपोर्ट जारी गरेको छ । ‘परराष्ट्र मन्त्रीज्यूबाट यससम्बन्धी कार्ययोजना स्वीकृत भएर आएको छ। अहिले हामी अध्ययन तथा छलफलका क्रममा छौं’, परराष्ट्रअन्तर्गतको केन्द्रीय राहदानी विभागका उपसचिव शरदराज आरनले भने । एमआरपीभन्दा इलेक्ट्रोनिक राहदानी गुणस्तरीय, विश्वासिलो र सुरक्षित मानिन्छ। एमआरपीमा भन्दा ई(पासपोर्टमा प्रयोग हुने ‘चिप्स’ र ‘सेक्युरिटी फिचर’ विश्वासिला हुन्छन् भने यस्तो पासपोर्ट नबिग्रने र नक्कली बनाउने सम्भावना हुँदैन।कार्ययोजनाअनुसार इलेक्ट्रोनिक राहदानी प्रचलनमा ल्याउन थप अध्ययनका लागि राहदानी विभागका महानिर्देशकको संयोजकत्वमा एक समिति गठन भइसकेको उपसचिव आरनले बताए। विभागका महानिर्देशक लोकबहादुर थापाले आगामी दुई बर्ष भित्र इलेक्ट्रोनिक राहदानी जारी गर्न अध्ययन थालिएको जानकारी दिए । आजको अन्नपूर्णमा समाचार छ ।