आमालाई छुरा हानेर छोरी भगाउने पक्राउ
माघ १३ -आमालाई छुरा हानेर छोरी भगाएका तीन युवकलाई पक्राउ गर्न सिरहा प्रहरी सफल भएको छ ।
पक्राउ पर्नेमा गोलबजार नगरपालिका–६ का महेन्द्र साह, सुरेश यादव र हकपारा गाविसका पप्पु दास रहेको इलाका प्रहरी कार्यालय गोलबजारका प्रहरी निरीक्षक सन्तोष निरौलाले जानकारी दिए ।
उनका अनुसार पाँच/सात जनाको समूहमा यही माघ ९ गते बेलुका गोलबजार–८ स्थित घरमै पुगेर मीनादेवीलाई छुरा हानेर उनकी छोरी ममतालाई भगाएका थिए । पक्राउ परेका तीनै जनामाथि अपहरण तथा शरीर बन्धक मुद्दा चलाएको प्रहरी निरीक्षक निरौलाले जानकारी दिए ।
छुरा प्रहारबाट घाइते ममताकी आमा मीनादेवीको उपचार गोलबजार अस्पतालमा सम्भव नहुँदा विराटनगर लगिएको छ । विराटनगरस्थित न्यूरो अस्पतालमा मीनादेवीको उपचार भइरहेको छ ।
उनको गालामा छुरा प्रहार भएको प्रहरीले जनाएको छ ।