Video » दुई बस ठोक्किँदा ४ जनाको मृत्यु, २९ जना घाइते (भिडियो) -

अपडेटः

विराटनगर, चैत्र १८ । मोरङको टंकी सिनवारी-६ स्थित निमुवामा बुधबार दुई यात्रुबहाक बस ठोक्किँदा ४ जनाको मृत्यु भएको छ । उदयपुरको बेलटारबाट विराटनगर आउँदै गरेको को१ख ४१९० नम्बरको बस र विराटनगरबाट धरान जाँदै गरेको को१ख ३८०५ नम्बरको बस ठोक्किँदा उक्त दुर्घटना भएको हो । मृत्यु हुनेमा सुनसरी लौकही–७ की विलक्ष्मीदेवी सहनी, सप्तरी छिन्नामस्त–८ का अरुण झा र भारत भीमनगरकी सुमित्रादेवी सिंह रहेका छन् । अर्का एक पुरुषको भने सनाखत हुन सकेको छैन । दुर्घटनामा २९ जना घाइते भएका छन् । तीव्र गतिमा रहेको बसका चालकले नियन्त्रण गुमाउँदा दुर्घटना भएको हुनसक्ने प्रहरीको अनुमान छ । घाइतेहरुको विराटनगरस्थित नोबेल र न्यूरो अस्पतालमा उपचार भइरहेको छ । मृतक मध्ये २ जनाको घटनास्थलमै र २ जनाको उपचारका क्रममा मृत्यु भएको प्रहरीले जनाएको छ । मृतक सबै बेलटारवाट आएको बसका रहेका छन् ।