कर्फ्यूको समयमा टिकापुरमा भीडले थारू समुदायको घर जलाउँदा रोक्न नसकेकोमा आक्रोश हेर्नुस भिडियो सहित
गत सोमबार हिंसात्मक घटना घटेको कैलालीको टिकापुर नगरपालिका र वरिपरिका गाउँमा स्थानीय प्रशासनले अहिले कर्फ्यु जारि गरेको छ। टिकापुर नगपालिकासहित वरिपरिका ९ गाविसलाई दंगाग्रस्त क्षेत्र घोषणा गरि कर्फ्यु जारी गरिएको स्थानीयले जानकारी दिएका छन्। सेतोपाटीसँग फोनमा कुरा गर्दै टिकापुर नगरपालिका वार्ड नम्बर ९ मा बस्ने बाबुराम चौधरीले भने,‘अहिले कर्फ्यु जारि गरिएकोले सुरक्षाकर्मीले कसैलाई हिड्न दिएका छैनन्, त्यसैले टिकापुर शान्त छ, केहि घटना भएको छैन।’ फोनमा कुरा गर्ने टिकापुरका धेरै थारू समुदायका मानिसले अस्ति मंगलवार कर्फ्युको समयमा स्थानीयको भीडले केहि थारु समुदायको घर जलाउँदा र पसल भत्काउँदा सुरक्षा दिन नसकेको भन्दै सुरक्षाकर्मीको आलोचना गरे।
‘कर्फ्यु भन्ने, घरबाट मानिस बाहिर निस्कन पाउँदैन भन्ने अनि भीडले एउटा खास समुदायको घर जलाउँदा सुरक्षाकर्मीहरू हवाई फायर मात्रै गरेर बस्ने?’ एक आक्रोशित स्थानीय थारू अगुवाले सेतोपाटीसँग भने। सोमवार थरूहट प्रदेशका पक्षधरहरुको प्रदर्शनीका क्रममा घटेका हिंसात्मक घटनामा सात सुरक्षाकर्मी र एक बालकको हत्या भएपछि मंगलबार पहाडे समुदायका केहि मानिसले आक्रोशपूर्ण प्रदर्शन गरेका थिए। सो अवसरमा केही स्थानीय थारूहरूको घर जलाइएको थियो। कैलाली क्षेत्र नम्बर एकका प्रत्यक्ष तर्फका सभासद जनक चौधरी, सद्भावना पार्टीका केन्द्रीय उपाध्यक्ष रेशम चौधरी, र स्थानीय ब्यापारी मिरू चौधरीको आफ्नै घरमा रहेको इलेक्ट्रोनिक पसल मिरू टेडर्समा आगजनी तथा तोडफोड भएको थियो।
त्यसबाहेक थारू समुदायका मानिसहरुको स-साना चिया तथा फलफूल पसलहरु तोडफोड भएको उनीहरुले बताए। टिकापुरमा थारु समुदायका मानिसहरुको ६० प्रतिशत घर तोडफोड र जलाइएको छ रे हो भन्ने प्रश्नमा बाबुरामले भने, ‘त्यस्तो त लाग्दैन। कर्फ्युले गर्दा हामी धेरै बाहिर जान पाएको छैन। तर स्थानीय एफएमहरुले त्यस्तो भनेको छैन।’ फोनमा कुरा गर्ने कतिले टिकापुर वारिपरीका गाउँ र कमैया बस्तिहरूमा सुरक्षाकर्मीहरूले खानतलास गरेको आफूले सुनेको बताए। ति मध्ये एक जनाले स्थानीय अल्फा चर्चमा प्रहरीले गएर हातपात गरेको बताए। ‘चर्चमा बसिरहेका करण चौधरीलाई प्रहरीले तिमी पनि थरूहटको कार्यकर्ता हो? अस्ति आन्दोलमा आक्रमण गर्ने तिमी पनि हो भनेर हप्काए। त्यही चर्चका मंगल चौधरीले सम्झाएर प्रहरीलाई पठाए। तर पछि करण चौधरी बाटोमा हिँडीरहेको बेला प्रहरीले टाउकोमा दुई घुस्सा लगायो, खुट्टामा पनि पिट्यो’, उनले भने। करण चौधरीसँग सम्पर्क गर्ने हाम्रो प्रयास सफल हुन सकेन। टिकापुरमा बस्ने एक अगुवा राजनीतिक कार्यकर्ताले भने नगरपालिका वरिपरिका गाउँ र कमैया समुदायमा प्रहरीले धेरै खानतलास गरेको आफूले सुनेको बताए।
टिकापुर नगरपालिकाको पूर्वमा शिवनगर टोलमा ठूलो कमैया बस्ती छ। त्यहाँ करिब ३५० कमैया परिवार बस्छन्। सोही बस्तीमा बस्ने विवश चौधरीलाई हामीले फोन गरेर सोध्यौं,‘तपाईको बस्तीमा सुरक्षाकर्मी खानतलासी गर्न आएको छन्?’ उनले भने, ‘हाम्रो बस्तीमा त आएका छैनन् तर दक्षिणपटिको टोलमा आएका थिए भन्ने सुनेको छु।’ बिवसले कर्फ्युले कमैया बस्तीका बासिन्दाको दैनिकी कठिन बनेको बताए। ‘धेरै कमैयाहरुले दैनिक ज्यालादारी गरेर आफ्नो गुजारा चलाउछन्। धेरैको राशन सकिसक्यो,’ उनले भने ‘मेरैमा पनि चामल अव दुई-तीन दिन भन्दा धेरै पुग्दैन। किन्न जाने ठाउँ छैन।’
