कैलाली र रौतहटमा सेना परिचालन
टीकापुर घटनापछि कैलालीमा सेना परिचालन गरिएको छ । कफ्र्यु लगाइएको रौतहटमा पनि सेनाले गस्ती थालेको छ । दुवै जिल्लाका केही भाग संकटग्रस्त क्षेत्र घोषणा गरिएका छन् । कैलाली प्रशासनले दिउँसो ४ बजेदेखि टीकापुर नगरपालिका, मनुवा, नारायणपुर, जोशीपुर र दुगौली तथा त्यसआसपासका क्षेत्रलाई दंगाग्रस्त क्षेत्र घोषणा गरेको छ ।
ती क्षेत्रमा पाँच वा सोभन्दा बढी व्यक्ति समूहमा हिँडडुल गर्न नपाउने, प्रहरीले विनापुर्जी जोकोहीलाई पक्राउ गर्न सक्ने, नारा–जुलुस गर्न र पर्चा–पोस्टर टाँस्न नपाउने प्रशासनले जनाएको छ । हिंसाजन्य गतिविधि हुने अवस्थामा गोली हान्न सक्नेसम्मको अधिकार सुरक्षाकर्मीलाई दिइएको छ । स्थानीय प्रशासनको निर्णयलगत्तै साँझ टीकापुर क्षेत्रमा नजिकैका दुई गणबाट सैनिक बाहिर निस्केका छन् ।
पूर्व–पश्चिम राजमार्ग आसपासमा रहेको गोरांगे ब्यारेक तथा अत्तरिया र गोदावरीको बीचमा रहेको तेघरी ब्यारेकबाट सेना परिचालित भएको जंगी अड्डाले जनाएको छ । ‘दंगाग्रस्त क्षेत्र घोषणा भइसकेको अवस्थामा स्थानीय प्रशासनले सेना परिचालन गर्ने निर्णय गरेपछि सेना परिचालित भएको छ,’ सैनिक प्रवक्ता सहायकरथी जगदीशचन्द्र पोखरेलले भने ।
कैलाली प्रशासनले स्थानीय प्रशासन ऐन २०२८ को दफा ६(ख) अनुसार दंगाग्रस्त क्षेत्र घोषणा गरेर सेना परिचालनको निर्णय गरेको हो । उक्त दफामा कुनै विशेष क्षेत्रमा परिस्थिति प्रहरीको काबुबाहिर गएमा स्थानीय प्रशासनको निर्णयअनुसार सेना परिचालन हुन सक्ने प्रावधान छ । देशैभरि संकटग्रस्त अवस्था उत्पन्न भए सुरक्षा परिषद्को सिफारिसमा राष्ट्रपतिले सेना परिचालन गर्न सक्ने संवैधानिक व्यवस्था छ । आजको नयाँ पत्रिकामा खबर छ ।
